வித்தியாசம்

ஏதேதோ நினைவுகளுடன் 

உறங்கிப்போகின்றேன்.. 

நினைவுகள் 

கனவுகளாய்த் தொடர்ந்து 

விடுகின்றது ..

விழித்தவுடன்  

கனவுகள் மறைந்து

நினைவுகள் மீண்டும் 

தொடர்கின்றது..

என் உறக்கத்திற்கும் 

விழிப்பிற்கும் 

என்னதான் வித்தியாசம் ..?

கலாப்ரியன்

இழப்பு

 

ஓஓ 

என்ற கதறலுடன் 

ஒரு கைபேசி 

அழைப்பு 

அதிகாலை வேளையில்..!

மாமா எனும் 

ஒரு உறவு ஒன்று 

மறைந்துவிட்டது 

இதுதான் 

செய்தி...

இதுதான் நடக்கும் 

என முன்பே 

தெரிந்திருக்கும் போல...! 

மனம் 

சிறிது சலனப்பட்டு 

மீண்டும் மீண்டுவிட்டது ..!!

முன்பு ஒருநாள் 

நண்பனின் இழப்பு 

அதன் பின் 

ஒரு உறவின் 

இழப்பு ..

ஒவ்வொரு முறையும் 

மனம் 

சலனத்திற்கும் மீட்சிக்கும் 

நடுவில்...

நமக்காகவும் 

ஒரு அழைப்பு 

என்றோ ஒருநாள் 

யாரோ ஒருவர்

செய்யத்தான் போகின்றார் ..

இருப்பினும் 

வாழ்க்கை மட்டும் 

ஏனோ 

இன்னமும் ஒரு 

சின்ன வட்டத்துக்குள்ளேயே ..!

கலாப்ரியன் 

தந்தி

அதிகாலையில் வரும் 

கைபேசி 

அழைப்புகள் எல்லாம் 

தந்திகள் போல 

ஏனோ 

ஒரு பயத்தைத் 

தந்து விடுகின்றது!

கலாப்ரியன்

கடைசி தோசை

அம்மா 

கடைசி தோசை 

சுட்டு முடித்த 

பின்பு 

சட்டியில் இன்னமும் 

ஒட்டியிருந்தது 

என் பசியும் 

எங்கள் வீட்டு 

ஏழ்மையும் 

கலாப்ரியன் 

தொடரும் பயணங்கள்

விளக்கின்றி இருளில் 

நீண்டோடும் வீதிகள் 

நீரின்றி காய்ந்த 

தெருவோர குழாய்கள் 

சாதி இல்லை என்று சொல்லும் 

சாதிக்கட்சித் தலைவர்கள் 

 

நிலம் போலவே காய்ந்துபோன

விவசாயியின் வயிறுகள் 

நீதி இன்றி வாடும் 

நீதிமன்ற வாசல்கள் 

ஊதியம் போலவே 

முறைப்படுத்தப்பட்ட கையூட்டுகள் 

மீண்டும் ஒரு ஊழல் 

மீண்டும் ஒரு தேர்தல் 

மீண்டு வரும் தலைவர்கள் 

இங்கே 

ஊழலின் விதைகள் 

தலைவர்களிடம் இருந்தும்! 

ஊழலுக்கான உரங்கள் 

மக்களிடம் இருந்தும் !!

நாடு எங்கே செல்கிறது 

தெரியாமலே 

தொடரும் பயணங்கள்.

கலாப்ரியன்

 பேரறிவு

அறிந்து கொள்ளும் ஆவலில்  

தேடித்தேடி அலைகிறேன்  

பூட்டிய அறைக்குள்ளே 

சாவி அடைபட்டது போல 

தேடலின் எல்லை தொடும் முன் 

தேடும் பொருளிலே  - நான் 

தொலைந்தும்  போகிறேன்..

இங்கு அனைத்தும் ஒன்றாய் - அந்த 

ஒன்றே இங்கு அனைத்துமாய் 

என்னுள் எல்லாமுமாய் 

எல்லாவற்றிலும் நானாய் அறிந்தபின் 

நீயென்ன நானென்ன 

நீரென்ன காற்றென்ன 

கடலென்ன மலையென்ன 

அனைத்தும் நாமாய் 

அறிந்த அறிவே இங்கு 

பெரியதாய்...

கலாப்ரியன்

வறுமைகால வசந்தங்கள் ..

🙏🙏🙏🙏🙏🙏
பள்ளி செல்லும் காலத்தில்
பத்து பைசா கல்கோனா ..

காசு கொஞ்சம் பத்தலேன்னா
அஞ்சு பைசா ஆரஞ்சு மிட்டாய் 🍬..

பக்கத்து வீட்டு பையன் போல
ஊதாக்கலர் சட்ட 👕..

மூணுவேல சோறு 🍚
முடிஞ்சா
கூட கொஞ்சம் துவையல் ..

உமிக்கரிதான் கருப்பா
தேய்ச்சா பல்லு 🦷
தெரிச்சுடுமே வெளுப்பா ...

குடிசைக்குள்ள தூக்கம் ⛺
குறட்டை 💤கூரையக்கூட தூக்கும் ..

காலம் கொஞ்சம் போக..
காதோரம் நரைக்க
போறபோக்கில் வாழ்க
ரொம்ப 👌🏻நல்லாவே போகுதுங்க ...

எல்லாமே இருந்தும்
என்னத்ததான் நான் சொல்ல...

என் இளம காலவசந்தத்த
கையைபிடிச்சு கூட்டிக்கிட்டு ...
இந்த எழவெடுத்த வறும இப்ப
போயேதான் போச்சுதுங்க
 💔💔💔💔...

கலாப்ரியன்

மகளதிகாரம் 3

பிறந்தபோது 
தாயாகத் தெரியும் மகள்கள்
தாயானலும் கூட
குழந்தைகளாகவே
இருந்துவிடுகின்றனர்

கலாப்ரியன்

நல்வாழ்க்கை ..!

இப்போது தான்
ஓரிரு வாரங்கள்
என் நுரையீரல்
சுத்தமான காற்றை
சுவாசிப்பதாய் உணர்கிறது

மொட்டை மாடிகளில்
காற்றுடன் சேர்த்து
சில
மனிதர்களின் நடமாட்டம்

மக்கள் ஓட்டத்தை
உணவுக்காகவும்
அத்தியாவசத்திற்கும் என
காண முடிந்தது

ஆரோக்கியத்துக்காக
அதிக அக்கறை ..
அளவான உணவு ..
முடித்த அளவு
உடற்பயிற்சி ..
குடும்பத்துடன் சேர்ந்துணவு ..
குழந்தைகளுடன்
விளையாட்டு ..
இல்லாதவர்க்கு
அரசாங்க ஆதரவு ..
எல்லோர்க்கும் மருத்துவம் ..
என
எத்துணை மாற்றங்கள்...

நல்லதை எல்லாம்
ஏற்றுக் கொள்ள ..
நாளும் அதை
நிரந்தரமாக்க ..
எல்லோர்க்கும் சமவாய்ப்பு..

காரணம் கேட்டேன்
ஏதோ
கண்ணுக்குத்தெரியாத
நுண்ணியிராம்..

காரணம்
எதுவாயிருந்தானலென்ன ..
கடவுளும் தான்
கண்ணுக்குத்
தெரிவதில்லை தானே ..

மீண்டு(ம்) வாழ்வோம்
நல்லதொரு வாழ்க்கை

கலாப்ரியன் 

ஆவியானவர்...

என்னிடம் அன்பை
எடுத்துக்கொண்டு
பாவங்களைக் கொட்டிவிடு
என்று
இரண்டு கைகளையும் விரித்து
வந்தவரை
ஆணியில் அறைந்து
ஆவியாக்கினோரே..!

அவர் மீண்டும்
ஆவியாகவே வந்தார்

நாம்
இன்னும் பாவியாகவே.. !!

தீபாவளிச் சட்டை

ஒரே ஒரு சட்டை
தீபாவளிக்கு.!
அதுவும்
ஐம்பது ருபாய் மட்டும் !!

கிழிந்த பின்னும்
அதைப் புதிதாக்க
அம்மாவால் முடிந்தது !!

சின்ன சின்ன பூக்கள்
போட்ட சட்டையில்
பூக்களை விட
கிழிசல்கள் அதிகமாவதற்குள்
அடுத்த தீபாவளியும்
வந்துவிடும்

வரப்போகும் நாளுக்காக
வருடம் முழுவதும்
காத்திருந்த அனுபவம்
இப்போது நினைக்கும்போது
இன்னொரு முறை
இனிக்கிறது

இல்லாமை இருந்தும்
என் அப்பாவால்
தரமுடிந்த மகிழ்ச்சி ..
என்னிடம்
எல்லாம் இருந்தும்
இயலாமை மட்டுமே
பெரும்பாலும்!!

வாழ்வே அருளாக
ஆகும் போது
வாழ்வதற்குப் பொருள்
தேவைப்படுவது இல்லை ..
வாழ்வோம் அருளுடன்
வாழ்க வளமுடன்

~கலாப்ரியன் 

தாய்மரம்

வயிற்றில் உதைக்கும்
குழந்தையை
வலிந்து அணைக்கும்
தாயைப்போலத்தான்
மரங்கள்...

தன்னை
உதைப்பவன்
தலையில் கூட
பூமழைப் பொழிகின்றது....

கலாப்ரியன் 

இறையுடன் இணைவதெப்போ

கடலாய் ஆவியாய்
மழையாய்த் துளியாய்
நதியாய் நான்
ஓடி ஓடி
மீண்டும் மீண்டும்
உருவும் கருவும்
மாறி மாறி
மீண்டும் கடலாய் ..!

எல்லாம்
கடந்து
என்னைத்
தொலைத்து
உன்னுள் சேர்வது
எக்காலம்??

கலாப்ரியன்

மௌனமொழி

விடை ஏதும் கிடைக்காமல்
என்னுள் அடங்கிய
கேள்விகள்
பல உண்டு

என்னிடம் கேட்கப்படாமல்
அடங்கிய
பதில்களும்
பல உண்டு

அதிகம் கிடைத்தப் பின்
அடங்கும் சில
ஆசைகளைப் போல

மனதின்
இறைச்சல் அடங்கியதும்
எல்லாம் விளங்கியது ..!

கேள்வியாய்ப்
பதிலாய்
அறிவே அனைத்துமாய்
மௌனமே அதன் மொழியாய் ..!!

கலாப்ரியன்

குரு அருள் ...!

எல்லையற்ற  பிரபஞ்சத்தில்
இரவென்ன
பகலென்ன

எண்ணமற்ற மனதிற்கு
இன்பமென்ன
துன்பமென்ன..

அல்லலுற்று வாழ்கின்றேன்
நான் செய்யா
தவம் என்ன...

இறை நடத்தும் நாடகத்தில்
நீயென்ன
நானென்ன...

மீண்டு வரும்
வழி தெரிய - குருவின்
அருளன்றி வேறென்ன...

~கலாப்ரியன்

ஆசை..!

கரையுடைத்து 

ஊர் பார்க்க  

கடலுக்குப் 

பேராசை..!

கடலை எல்லாம் 

பருகிவிட 

சூரியனுக்கும் 

ஓர் பேராசை..!

கரு மாறி..  உரு மாறி 

காலமெல்லாம் 

வாழ்ந்துவிட 

மண்ணுக்கும் தான் 

பேராசை..!

நாசி வழி 

வந்து செல்லும் 

காற்றுக்கும் ஓர் 

ஆசையுண்டு ..

வாசியாக மேலேறி 

வாசம் செய்யும் 

பேராசை..

எங்குமுள்ள 

விண்வெளியோ  

என்னுள்ளே அறிவாக... 

ஏதுமோர் ஆசையின்றி 

இறையுறவாய் இருப்பதனால்..

என் அறிவை அறிந்து விட 

எனக்கும் 

ஓர் பேராசை..!

~கலாப்ரியன் 

அறியப்படாத வசந்தங்கள்...

ஆற்று நீர் குளியல்
ஆத்தங்கரை விளையாட்டு

மண்பானை சமையல்
மறுநாள்
நீர்மோறும் பழையசோறும்

பசித்த பின் தான் உணவு
அதுவும்
இரு வேளை மட்டும் தான்

ஆரோக்கியத்தைப்  பாதுகாக்க
தேவையற்ற
தனி முயற்சி
எங்கு சென்றாலும்
நடைதான் ..
பெரும்பாலும்
கால்களே வாகனம்

நண்பர்களுடன்
அரட்டைக் கச்சேரி
தெருவோர மிட்டாய் கடை
காசிருந்தால் சர்பத்
இல்லையென்றால்
அடிபம்பு தண்ணீர்

மாலை முழுதும் விளையாட்டு
மங்கிப்போன வெளிச்சத்தில்
அக்காவுடன் வீட்டுப்பாடம்

எல்லாருக்கும்
ஓர் விரிப்பு
அம்மாவுக்குத்  தலையணை இல்லை
எனக்கு மட்டும் அவளின் இடது கை
ஆழ்நிலையில் உறக்கம்

எதிர்பார்ப்புகளற்ற அடுத்தநாள்
மறுபடி ஓர் விடியல்


இப்போது தான்
புரிகிறது ..

இளமையில் இருந்தது
வறுமை அல்ல
அது
அறியப்படாத
ஒரு வசந்தம்..


~கலாப்ரியன்

கல்லறைக் கதவுகள்

உறவோ
நட்போ
உங்களை விட்டு
விலகும் ஒவ்வொன்றுக்கும்
உங்கள் வாழ்வின்
கதவுகளில் ஒன்று
அடைபடுகிறது!

நினைவு கொள்ளுங்கள்...

கதவுகளே
இல்லாத
ஒரே இடம்
கல்லறை மட்டுமே...

~கலாப்ரியன் 

முத்தம்

எல்லா முத்தங்களும்
காமத்திற்குச்
சொந்தமானவை அல்ல...
உதடுகளைத் தாண்டி
உயிர் வரை
செல்லும் முத்தங்களும்
உண்டு...
மகள்களைப் பெற்ற
மனிதர்களுக்கு
மட்டுமே கிடைக்கும்
வரம் அது....

~கலாப்ரியன் 

சில்லறை பாக்கி

நடத்துனர் 

தரவேண்டிய 

சில்லறை பாக்கியே 

எண்ணம் முழவதும் ..

சன்னலோர இருக்கைக்கும்  

இதமான 

காற்றுக்கும் கூட 

தூங்க மறுக்கும் 

ஏழையின் கண்கள் ...

#கலாப்ரியன்

Image Courtesy - https://www.flickr.com/photos/27727912@N03/9771000741/in/photostream/